حاجات ومحتاجات

Tuesday, March 27, 2007

الاتنين مارس ٢٦, ٢٠٠٧ يوم تاريخي في حياة (ولا موت؟) مصر

امبارح قعدت اتفرج عالتلفزيون لمتابعة اخبار الاستفتاء على تعديل مواد الدستور وحسيت على اخر اليوم اني على بوادر الاصابة بالشلل من اللي شفتة. طبعا التلفزيون المصري بيقول لنا ان كل شئ تمام والامن مستتب والناس مبسوطة و العملية بتجري بمنتهى النزاهة والامانة. احول على قناة اليوم وبرنامج القاهرة اليوم اشوف حاجات غريييبة. منها ان اللجان فااااضية ومحدش معبر الحكومة والناس اللي راحت عندهم جهل رهيب باللي بيجرى. على سبيل المثال، واحدة شكلها بسيط سالتها مراسلة حضرتك عارفة انتي هنا لية؟
-اه عشان اقول نعم
-تقولي نعم على اية؟
-على الانتخابات
الست فاكرة انها جاية تنتخب مبارك!!!
واحدة تانية
-حضرتك قلتي نعم ولا لا؟
-لا قلت نعم
-لية؟
-عشان حرية المرأة!!!

واحدة تانية قالت انا قلت نعم
-لية؟
?مش يمكن لما الريس يلاقينا معاه يرخص الاسعار شوية!!!!

وطبعا دول الناس اللي الحزب الوطني حاشدهم ومدي كل واحد بتاع خمسة ولا عشرة جنية كدة عشان يروحوا ينتخبوا مبارك! المهم ان مراسلين القنوات الخاصة ومراسلين ال American Press و Human Rights Watch اجمعوا ان الاقبال كان ضعيف جدا جدا ومع ذلك كانوا بيدخلوا اللجنة يلاقوا الصناديق مردومة بطاقات انتخابية!! وبعدين يطل علينا السيد المحترم احمد عز يقول لنا ان كل حاجة تمت بمنتهى النزاهة ويالف تاليفة كدة ان الامور كانت على مستوى عالي من الدقة وان كل حاجة بتتم بالكمبيوتر فمش ممكن يكون في تزوير وكلام كدة ميدخلش دماغ عيل عندة خمس سنين. وطبعا طلعوا علينا انهردة يقولوا ان ٣٠ % من ال ٣٥ مليون مواطن المسموح لهم بالتصويت ادلوا باصواتهم في حين ان وكالات الانباء العالمية بتقول ان النسبة لا تتعدى ال ٣% !! يعني مليون مواطن تقريبا ادلى بصوتة مش ١٧ مليون!!!
اللي حصل اثبت لي اكتر ان المقاطعة فكرة فاشلة تماما. عدم وجود الناس هو اللي سمح بالسهولة المطلقة في التزوير. طبعا كل واحد قاعد في لجنة مهوية يروح مالي هو البطاقات الانتخابية وخلاص على كدة. صحيح مش معنى وجود حشود غفيرة ان التزوير مكنش هيحصل، لكن بردة لو كان الاخوان بردة حشدوا ناس وكفاية حشدت ناس وكل حزب وتوجة معارض حشد اتباعه، كان ممكن لما يقولوا لنا ان ٧٦% قالوا نعم تطلع الاحزاب دي تقول ازاي اذا كان انا جايب كام الف ودة كام الف ودة كام الف وكلهم قالوا لا؟ من الطف التعليقات باءة كان تعليق شيخ الازهر اللي حث الناس على الادلاء باصواتهم لان دي تلبية لامر ولي الامر ولان اللي يكتم الشهادة اثم!!!! وعند سؤالة عن راية في التعديلات قال انا معرفش عنها اي حاجة يا بية اصل محدش جبهالي!!!ياااا راااجل!!والاكتر لطفا باءة تصريحة للمصري اليوم: "بالطبع أيدت التعديلات الدستورية لأنها تضمن مستقبلا أفضل لجميع المواطنين المصريين، ويوم الاستفتاء علي هذه التعديلات هو عرس للديمقراطية"هما دول علماء الامة ولا بلاش صحيح
وفي النهاية كام لينك كدة لانطباعات المدونين على اليوم التاريخي:

اللي حصل دة، الناس اللي زورت دي مش دي شهادة زور؟ طب الناس دي متعرفش ان الرسول علية الصلاة والسلاملما ذكر شهادة الزور قال : ( ألا وشهادة الزور ألا وشهادة الزور ) وكررها "حتى ظن أصحابه انه لا يسكت ، وقالوا ليته يسكت" معقولة مفيش اي ضمير خالص؟ هو اية اللي بيحصل بس؟
كفاية كدة اكتئبت

5 Comments:

At 1:50 PM, Blogger 7ntklm said...

وانهاردة ابو جمال بيقولك التعديلات الدستورية ليست نهاية المطاف

هيعمل ايه تانى هينفنا فى بطن الارض

 
At 10:34 AM, Blogger قلم جاف said...

في الأول يقولولنا التعديلات هي غاية المراد ودلوقت يقولولنا الفلوس - عفواً - التعديلات مش كل حاجة!

العالم دي إما عايزة حد مش فاهم حاجة أو حد مؤمن بعبارة "هوة فيه حد النهاردة بيفتكر"!

حزب مسلي ومعارضة مسلية وإحنا كشعب بقينا كلنا بلا استثناء مسليين للغاية مع الحكومة ومع بعضتشينا.. بأحس إن المصري لما بيموت مبيموتش من الزهق ولا من الملل ولا من الغيظ..

وكما قال جمال بخيت :

يا مصري ليه دنياك لخابيط والغلب محيط..

والعنكبوت عشش ع الحيط وسرح ع الغيط..

 
At 4:58 AM, Anonymous موقع زواج said...

نشكرك على ه1ا المجهود الرائع

 
At 12:43 AM, Anonymous العاب said...

well done

 
At 7:22 AM, Anonymous سيارات said...

يعطيك العافية

 

Post a Comment

<< Home