مليون 95!! دول فكة يا ناس
يا سلاااام عالجمال والفن
فن فن فن فعلا يعني
اللوحة دي لبيكاسو اللي مش فاهمة لحد دلوقتي لية بيقدم على انة "الفنان العظيم"
اللوحة دي اتباعت انهردة ب 95 مليون دولار
!!!!!!!!!!
'Dora Maar with Cat' اسمها
نفسي بس اشوف الشخص اللي اشتراها بالمبلغ المهول دة واقول لة انت سخن يا حبيبي؟
طول عمري اشوف لوحات الراجل دة وافكر ان الفن الحقيقي هو اللي الكل يفهمة ويتلذذ بة. يعني محدش محتاج يكون دارس موسيقى عشان تسحرة اغاني فيروز لانها حاجة بتوصل للروح على طول مش محتاجةشهادات ومقدمات لكن لوحات بيكاسو اظاهر لازم اكون دارسة الرسم السريالي ولا مش عارفة اية الاسلوب الفذ اللي ابتكرة كان اسمة اية عشان افهم
واللوحات اللي فعلا فيها فن هي اللي اي حد يشوفها ويقول الله اية الجمال دة
لكن لوحات مستر بيكاسو اقول الله هو كان مغمض عينة وهو بيرسم ولا اية؟
اللوحة فعلا اول ما شفتها قلت دة راسم ساحرة شريرة القدر عاقبها بلخبطة خلقتها
بس دة دي المفروض واحدة من عشيقاتة. شكلها كان كدة؟!
انا من وجهة نظري اللوحة دي بتعبر عن حاجتين: عن السفة الشديد وهي تخليد للمقولة العبقرية رزق الهبل عالمجانين !
posted by حاجات ومحتاجات @ 11:00 AM
7 Comments:
فيه برضه ناس كتيرة رأيها من رأيِك.. ودة بيفكرني بمصطفى محرم-ودة حاجة تانية خالص غير ما بيكتب.. الصراحة راحة- ونقده اللاذع ليوسف شاهين (وبصراحة عنده حق في كل كلمة قالها)...ما معناه إنه بيجيب ممثلين بيتهتهوا وبيفرض بصمته على كوووووووووول حاجة في الفيلم ...الخ...
مش كل ما هو متكلف جميل ، ومش كل ما هو شعبي فاشل وبذيء..
مرحبا
انا اتفق معاك ان الواحد طالما مش دارس الفن مش هيفهم او يقدر فعلا اى حاجه لبيكاسو..
بس فى نفس الوقت مش يدينى الحق انى اقلل من روعته
مش معنى عدم فهمى ليه انه وحش او بلا معنى ولا يستحق
ده راى
غريب قوي التعريف اللي أنت حطتيه للفن هو الحاجات اللي بتوصل من غير دراسة و لا مش عارف أيه لكن المشكلة أن حضرتك مش البشرية عشان تحكمي علي اللي بيوصل و مش بيوصل و رغم أني بحب فيروز بس أنا بتفهم أي حد بيكره فيروز لو وجد يعني أما بالنسبة للحمار مصطفي محرم فيخليه في اللي هو فيه و النبي مصطفي محرم ده يفهم أيه في أي حاجة عشان يتكلم عن قامة سينمائية زي يوسف شاهين مصطفي، حاجة أخيرة أنا بحب بيكاسو جداً و أظنني بفهمه و بحسه عموماً أنصحك تقري تاريخ الفن في القرن العشرين مش فاكر أسم المؤلف بس لو أنتي مهتمة ممكن أطلعهولك من عندي و أجيبلك دار النشر و السنة و كل الحوارات دي و أقري في الفصل المخصص عن بيكاسو عشان تفهمي أيه مصدر عظمته و تأثيره
دة رايي انا يا جماعة مزعلكوا لية :)
انا شايفة فعلا ان الفن اللي بجد هو اللي يوصل للجميع من غير ما اقرا لة كتب ومراجع. بالتاكيد في ناس هتختلف معايا وبالتاكيد فية اللي بيحب بيكاسو-زي اللي اشترى اللوحة كدة (وان كان ممكن يكون مشتريها عشان يقول انا عندي لوحة بيكاسو مش عشان بيحبة ;)
ويا مانورا انتي عندك حق لكن انا بتكلم على ردة فعل البني ادم العادي اول ما يبص على اللوحة دي.
استاذ زنجي
انا مش البشرية بالفعل لكن انا في "مدونتي" بقول "رايي" انا الشخصي مقلتش بيكاسو محدش بيحبة لانة حمار.
هدي لحضرتك مثال-انا من عشاق شكسبير وبعتقد انة كاتب عظيم لكن ناس كتير تقرا مسرحياتة (الانجليزي مش المترجمة) وتقول اية الهبل اللي هو كاتبة دة لانها مش فاهمة مع ان لو فهموا طريقة كتابتة هيحبوة جدا. وانا مع اني شايفة ان شكسبير فنان كبير جدا في مجالة الا اني بشوف ان صلاح جاهين مثلا فنان اكتر منة لان ممكن اي حد يفهمة من غير ما يكون دارس طريقة كتابة معينة.
ودة رايي الشخصي :)
ايوة انا فعلا فهماكى فى نقطة رده الفعل
انا اول ما شوفت اللوحة اصلا قولت ايه ده!!
ولما لقيتك بتقولى اتباعت ب الرقم الفظيع ده اذبهليت اكت رواكتر لغايه لما عرفت انها لبيكاسو وكده
هنا قولت انه اكيد فى مليون حاجة مش هقدرها انا موجوده و خلت اللوحة تتباع بالمنظر ده
ويعنى طبعا لولا انك قولتى انها لبيكاسو عمرى ماكنت هاعرف انها تبع حد ليه اسم اساسا
اللي عاجبني فب الموضوع ان لوحاته لسه ليها قيمة عالية... يعني من الناحية الدنيوية مضيعش حياته عالفاضي
Hi! Just want to say what a nice site. Bye, see you soon.
»
Post a Comment
<< Home