حاجات ومحتاجات

الوعي المصري

2007-12-05T09:58:00.000-08:00

مدونة الوعي المصري من المدونات الرائعة في رايي.بيعجبني جدا تفاني وائل عباس في تغطية الاخبار وتعريف الناس باللي بيحصل منغير ما نعرف وبسنريح لما اعرف ان في غيرة كتير من اللي خايفين على البلد دي وعايزينها تتغير للاحسنمتعودين منة انة يقولنا كل فترة على غتاتة الامن وتضييقهم علية عادي خالصلكن ذهلت من اللي عملتة اليوتيوب اللي اوقفت حسابة الخاص وضيعت بكدة كل فيديوهات التعذيب في اقسام الشرطة وفيديوهات تانية كتير لمظاهرات وخلافةكتكم القرف يا يوتيوب! هل دي شكاوي من النظام الجميل بتاعنا ويوتيوب

استجابت ولا اية تفسير القرف اللي حصل دة الله اعلم

:تحديث

يوتيوب رجعت الاكاونت لكن بدون اي فيديوهات! اكاونت بلاين!

العدل

2007-11-16T04:12:00.000-08:00

انهردة هكتب اخيرا عن خبر حلو، الا وهو ان اسلام نبية (الضابط اللي عذب عماد كبير واللي فيديو الي حصلة كان منتشر في كل حتة) حكم علية بالسجن ثلاث سنين مع الشغل والنفاذ يوم الاتنين 5 نوفمبر. لما قرات الخبر مصدقتش نفسي والله. صحيح تلات سنين اقل كتير مما يستحقة نبية، لكن اهي بداية مبشرة خلتني احس ان في امل

اللي حصل لنبية بيرجع فضل كبير فية لعالم المدونين اللي تابع الحادثة ونشر اللي حصل وتبع دة اهتمام من الاعلام ودي حاجة مبشرة بجد وتثبت ان التدوين مش مجرد كلام وخلاص. مين عارف ممكن يكون التدوين سبب في تغيير حقيقي في المستقبل

صورة من الوعي المصري لعماد الكبير وقت سماعة للحكم

وفيديو لرد فعلة
http://www.youtube.com/watch?v=zUVohnMCH98&feature=related

:وتعليق الواشنطن بوست

http://www.washingtonpost.com/wp-dyn/content/article/2007/11/05/AR2007110501673.html?nav=rss_world

حاجة جميلة وتفرح والله

البوست متاخر كتير بس البلوجر معلق معايا بقالة فترة :(

الاتنين مارس ٢٦, ٢٠٠٧ يوم تاريخي في حياة (ولا موت؟) مصر

2007-03-27T08:22:00.000-07:00

امبارح قعدت اتفرج عالتلفزيون لمتابعة اخبار الاستفتاء على تعديل مواد الدستور وحسيت على اخر اليوم اني على بوادر الاصابة بالشلل من اللي شفتة. طبعا التلفزيون المصري بيقول لنا ان كل شئ تمام والامن مستتب والناس مبسوطة و العملية بتجري بمنتهى النزاهة والامانة. احول على قناة اليوم وبرنامج القاهرة اليوم اشوف حاجات غريييبة. منها ان اللجان فااااضية ومحدش معبر الحكومة والناس اللي راحت عندهم جهل رهيب باللي بيجرى. على سبيل المثال، واحدة شكلها بسيط سالتها مراسلة حضرتك عارفة انتي هنا لية؟

-اه عشان اقول نعم

-تقولي نعم على اية؟

-على الانتخابات

الست فاكرة انها جاية تنتخب مبارك!!!

واحدة تانية

-حضرتك قلتي نعم ولا لا؟

-لا قلت نعم

-لية؟

-عشان حرية المرأة!!!

واحدة تانية قالت انا قلت نعم

-لية؟

?مش يمكن لما الريس يلاقينا معاه يرخص الاسعار شوية!!!!

وطبعا دول الناس اللي الحزب الوطني حاشدهم ومدي كل واحد بتاع خمسة ولا عشرة جنية كدة عشان يروحوا ينتخبوا مبارك! المهم ان مراسلين القنوات الخاصة ومراسلين ال American Press و Human Rights Watch اجمعوا ان الاقبال كان ضعيف جدا جدا ومع ذلك كانوا بيدخلوا اللجنة يلاقوا الصناديق مردومة بطاقات انتخابية!! وبعدين يطل علينا السيد المحترم احمد عز يقول لنا ان كل حاجة تمت بمنتهى النزاهة ويالف تاليفة كدة ان الامور كانت على مستوى عالي من الدقة وان كل حاجة بتتم بالكمبيوتر فمش ممكن يكون في تزوير وكلام كدة ميدخلش دماغ عيل عندة خمس سنين. وطبعا طلعوا علينا انهردة يقولوا ان ٣٠ % من ال ٣٥ مليون مواطن المسموح لهم بالتصويت ادلوا باصواتهم في حين ان وكالات الانباء العالمية بتقول ان النسبة لا تتعدى ال ٣% !! يعني مليون مواطن تقريبا ادلى بصوتة مش ١٧ مليون!!!
اللي حصل اثبت لي اكتر ان المقاطعة فكرة فاشلة تماما. عدم وجود الناس هو اللي سمح بالسهولة المطلقة في التزوير. طبعا كل واحد قاعد في لجنة مهوية يروح مالي هو البطاقات الانتخابية وخلاص على كدة. صحيح مش معنى وجود حشود غفيرة ان التزوير مكنش هيحصل، لكن بردة لو كان الاخوان بردة حشدوا ناس وكفاية حشدت ناس وكل حزب وتوجة معارض حشد اتباعه، كان ممكن لما يقولوا لنا ان ٧٦% قالوا نعم تطلع الاحزاب دي تقول ازاي اذا كان انا جايب كام الف ودة كام الف ودة كام الف وكلهم قالوا لا؟ من الطف التعليقات باءة كان تعليق شيخ الازهر اللي حث الناس على الادلاء باصواتهم لان دي تلبية لامر ولي الامر ولان اللي يكتم الشهادة اثم!!!! وعند سؤالة عن راية في التعديلات قال انا معرفش عنها اي حاجة يا بية اصل محدش جبهالي!!!ياااا راااجل!!والاكتر لطفا باءة تصريحة للمصري اليوم: "بالطبع أيدت التعديلات الدستورية لأنها تضمن مستقبلا أفضل لجميع المواطنين المصريين، ويوم الاستفتاء علي هذه التعديلات هو عرس للديمقراطية"هما دول علماء الامة ولا بلاش صحيح
وفي النهاية كام لينك كدة لانطباعات المدونين على اليوم التاريخي:

تعليق تسنيم

تعليق بنت مصرية

شهادة اخرى من الفريدوم سنتر

فيديو لتقفيل احد اللجان

اللي حصل دة، الناس اللي زورت دي مش دي شهادة زور؟ طب الناس دي متعرفش ان الرسول علية الصلاة والسلاملما ذكر شهادة الزور قال : ( ألا وشهادة الزور ألا وشهادة الزور ) وكررها "حتى ظن أصحابه انه لا يسكت ، وقالوا ليته يسكت" معقولة مفيش اي ضمير خالص؟ هو اية اللي بيحصل بس؟

كفاية كدة اكتئبت

اللبن طلع مضروب بس مش دة المهم يولاد مش دة المهم!

2007-03-19T08:45:00.000-07:00

طبعا الكل عرف ان اللبن طلع مش لبن(لكن بوتاس وبودرة سيراميك ومكونات شهية اخرى) والاكل طلع مش اكل وانت مطلعتش انت ولا الست دي امك ولا الراجل دة ابوك وانك لقيط قالوا يكسبوا في ثواب ففهومة ان اللبن لبن والاكل اكل وان كل حاجة اشتة عالاخر.

طيب نتكلم جد. طبعا مهزلة جديدة بتكشف قد اية الناس انحدرت اخلاقيا. يعني اللي يبيع لبن لواحد وهو مليان بودرة سيراميك مبيحسش باي ذنب على الاطلاق؟ طب لو الراجل مش هيتاذي افرض عندة طفل صغير القرف دة موتة مثلا؟ والمصريين دول فعلا اثبتوا انهم فراعنة- عايشين ازاي مع كل القاذورات اللي قادرة على تدمير اعتى جهاز هضمي؟ سبحان الله فعلا

لكننننن يا جماعة، مش كل مرة نظامنا الجميل يكون مدبر نصيبة يروح لاهينا بنصيبة صغيرة ننشغل بها. والنصيبة الكبيرة هنا يولاد هي التعديلات الدستورية. الكل مطنش الموضوع دة ومركز على اللبن مع ان للاسف حكاية اللبن مش جديدة يعني. طب ما المبيدات مسرطنة والدم مسمم وكلة جميل اهو الحمد لله فيا ريت نركز على البلوة اللي هتنيل حالنا اكتر ما هو متنيل.وعشان مبقاش بتكلم في الهوا، تعالوا اخدكم في جولة مع التعديلات المقترحة عشان ندرك البلد دي رايحة على فين:

أولا: تعديل المادة ٤١ واللي بتنص على الاتي

"الحرية الشخصية حق طبيعى وهى مصونة لا تمس، وفيما عدا حالة التلبس لا يجوز القبض على أحد أو تفتيشه أو حبسه أو تقييد حريته بأى قيد أو منعه من التنقل الا بأمر تستلزمه ضرورة التحقيق وصيانة أمن المجتمع، ويصدر هذا الأمر من القاضى المختص أو النيابة "العامة، وذلك وفقا لأحكام القانون. ويحدد القانون مدة الحبس الاحتياطى.
يعني من الاخر دلوقتي هيكون مسموح بموجب الدستور بالمساس بحريات الناس واعتقالهم بدون تلبس وبدون اذن من قاضي وولا يكون في

حاجة لا لقانون طوارئ ولا صداع

ثانيا: تعديل المادة ٨٨ واللي بتنص على الاشراف القضائي على الانتخابات، خاصة بعد حكم المحكمة الدسورية العليا اللي الزم الحكومة باشراف القضاء على كل اللجان العامة والفرعية. والتعديل هنا معناه ببساطة ان مفيش اشراف قضائي! وزور الانتخابات زي ما انت عايز

ثالثا: الضربة القاضية للاخوان ودة لان هيتم حظر اي نشاط سياسي على اي مرجعية او اساس ديني. طيب ما هو اصلا الاخوان غير مسموح لهم بتشكيل حزب. صحيح وهنا تيجي جزئية "حرمان المستقلين غير المنتمين الى أحزاب من الترشح لانتخابات الرئاسة." دة لان بالنظام الحالي، ممكن الاخوان يرشحوا أحد أعضائهم كمستقل في انتخابات الرئاسة اذا فاز بعدد كاف من المقاعد في البرلمان والمجالس

المحلية. لكن بالتعديلات دي، الاخوان هيروحوا في الترللي عالاخر

رابعا ولاول مرة في التاريخ رئيس الجمهورية هيكون له الحق الدستوري في حل مجلس الشعب دون الحاجة إلى استفتاء الأمة. يعني السلطة التشريعية في ايد سعادة الملك.

راي منظمة العفو الدولية:"التعديلات الدستورية المقترحة سترسخ ببساطة نظام الانتهاكات القائم منذ فترة طويلة بموجب قوانين الطوارئ وتعطي اساءة استخدام تلك السلطات شرعية كاذبة."
طبعا الاستفتاء على الاستهبالات الدستورية دي هيكون في اول ابريل القادم وفي ناس بتطالب بمقاطعة الاستفتاء! طلع اي حاجة فيها كلمة مقاطعة بتنطوي على فكرة فاشلة!! تقاطع الاستفتاء ازاي يعني يا حج؟ وتسهل عليهم الموضوع اوي كدة لية؟ ما تروح وتقول لاااا اللي بيحصل دة كلام فارغ مش يمكن دة يحرجهم؟ وحتى لو مفيش حاجة اتغيرت، اهو اسمك عملت اللي عليك وحاولت تمنع كارثة. منظمة العفو الدولية "حثت جميع أعضاء مجلس الشعب على رفض التعديلات المقترحة ومنها فقرة مناهضة للارهاب واصفة اياها بانها "أكبر تآكل لحقوق الانسان منذ 26 عام." فياريت منلاقيش المعارضة كلها قاطعت الاستفتاء فعلا

اختم بتعليق على كلام الدكتور عبد الوهاب المسيري منسق حركة كفاية اللي قال ان التعديلات المقترحة "تهريج سياسي دستوري." لا والله يا استاذ مسيري دة مش تهريج دة استهبال رسمي!

المسجد الأقصى

2007-02-11T02:40:00.000-08:00

في حين ان حماس وفتح نازلين خناق في بعض اسرائيل السوسة اللي مبتفتوتش فرص انهمكت في التفحير حول المسجد الأقصى

عااادي خالص خيبتنا دي عااادي

المش عادي باءة- المصريين طبعا شافوا اللي بيحصل دمهم اتحرق راحوا طالعين عالازهر يصلوا الجمعة ويدعوا ربنا يهد اللي محدش قادر عليهم. طيب في اية يعني؟في ان الناس اتمنعت من دخول المسجد للصلاة! وتم التضييق عليهم من قبل الامن عشان يطفشوهم من المكان. المهم ان الناس اللي جوا وهما طالعين واحد خدتة الجلالة وابتدى يهتف ضد اسرائيل. يقوم عساكرنا الابرار يقبضوا على ٢٠٠ واحد!!!!في اية؟ في اية يا حكومة منيلة على عينها؟ بتعتقلوا الناس لية؟ طب الفلسطيين واللي بيضيق عليهم اليهود، المحتل. لما عساكرنا يضيقوا علينا يبقى دة اسمة اية؟وبتودوا الناس دي فين؟ كل شوية ٢٠٠ على ١٠٠ على ٥٠ ! بتودوهم فين كل دول؟ربنا ياخدكوا وياخد اسرائيل وياخد فتح وحماس والقرف اللي ربنا مبتلينا بية!

!اتكلموا

2006-10-31T23:32:00.000-08:00

طبعا الكل قرأ عن الحادثة المقرفة المقززة الهمجية المفزعة اللي حصلت في وسط البلد

بعد اللي قراتة في مدونات مختلفة، مليش نفس اتكلم او اعلق. مذهولة؟ مصدومة؟ حزينة؟ كلة كلام ملوش معنى

معنديش اي تعليق غير ربنا يستر على البلد. يا ترى هنشوف اية بعد كدة؟

معنديش غير اني اساعد في نشر دعوة مالك- اتلكموا

كل سنة وانتوا طيبين

2006-10-13T17:49:00.000-07:00

انهردة، 14 اكتوبر 2006، يكون مر على حكم طويل العمر يطول عمرة وينصرة على مين يعادية هاي هئ 25 سنة

ربع قرن بالتمام والكمال

كل سنة واحنا طيبين وعقبال مية سنة :(

ــــــــــــــــــــــــــــــــ

The Arabist الصورة من عند

موجز وتعليق

2006-09-26T04:47:00.000-07:00

بابا الفاتيكان مُصر على تعليقاتة الساحرة بخصوص الاسلام ورسولنا الكريم

هتعملوا اية يا مسلمين؟ اقولكوا انا جتلي فكرة رائعة، يلا نلجأ للخطة المبهرة اللي بتقدر ترجع لنا كرامتنا كل ما نلجا لها- يلا ندور على

!!! بضائع فاتيكانية نقاطعها

انباء تشير الى وفاة بن لادن لاصابتة بالتيفود

يلا في ستين داهية

رئيس اليمن يفوز باكتساح بمقعد الرئاسة والمعارضة اليمنية تتهم الحزب الحاكم بالتزوير

وطننا العربي عامل زي مسلسلات رمضان- نفس الاحداث بتتكرر بمنتهى الملل

السيد نصر الله ظهر للمرة الاولى في مؤتمر سماة "مهرجان الانتصار" بيحمد فية الله على الانتصار الكاسح اللي حققة حزب الله ضد

اسرائيل وبيرفض نزع سلاح الحزب

السيد نصر الله بيعامل الموطان العربي زي ما حكوماته بتعاملة بالضبط- على انة ائن متخلف مش عارف مصلحتة فين ومن المستبعد جدا احتمال وجود عقل بين اذنية.انتصار اية يا حج؟! هو سيادتك لما تقف تهتف انك انتصرت انتصار عظيم وتدعم كلامك بعابارات

الاسرائيلين الجبناء" ، "مصلحة لبنان" "انتصرنا بفضل الله" ان العالم العربي هيقول هيــــــــــه يعيش نصر الله يعيش يعيش !!!يؤسفني جدا اني اقول ان الاسرائيلين هما الطرف الوحيد الصريح مع نفسة في الحرب على لبنان ومع انهم قدروا يحققوا انتصارات سياسية كبيرة الا انهم بيحاسبوا نفسهم بمنتهى الحزم على اي تراجع حصل من قبل العسكريين او رئيس وزرائهم في الحرب. ولبنان اللي تركها الاسرائيليين في خراب ودمار وصراع اشتعل بين حزب الله وبين كل من يريد نزع سلاح الحزب هي اللي انتصرت انتصار عظيم بتحتفل بة في مهرحان !!!

!!! اه يا تخلف ملوش حل

وأخيرا.. حماس لا تعترف باسرائيل وترفض كل اتفاقيات الحكومة السابقة مع اسرائيل

هيــــــــه تعيش حماس تعيش حمااااااااس. يا سلام عليكوا كبستوهم كبسة معتبرة يا ولا برافو عليكم والله دة انتوا الشعب الفلسطيني دة لو شاطر المفروض يحاكمكوا مش بتهمة الغباء السياسي لا، انتوا تستاهلوا تتحاكموا بتهمة العتة السياسي

مش عايز تعترف باسرائيل يخويا؟ لا والنبي اعترف بيها لحسن اليهود منهارين عالاخر والمرت كان بيلطم من حسرتة يا حبة عيني!!!

حاجة تقرف

كل سنة وانتوا طيبين :)

2006-09-24T06:20:00.002-07:00

بالرغم من كل الاخبار السيئة، الا ان رمضان بيهل علينا كل سنة ومعاه روح جميـــلة تنتشلنا من كابة اوطاننا المنكوبة

:) كل سنة وانتوا طيبين

التكيــــــــــــــــــــــــة

2006-09-19T10:25:00.000-07:00

اطلق اليوم الحزب الوطني يا اخواني مؤتمرة السنوي الرابع تحت شعار الفكر الجديد... وانظلاقة ثانية نحو المستقبل

الواحد طبعا يا اخواني في ظل هذا المؤتمر الموعود الذي ينتظرة كل المصريين بفرغ الصبر ليقينهم انه مؤتمر منهم واليهم، الواحد دارت في دماغة افكار من المفيدة بجد بدل ما نقعد نفكر في الاصلاح والفكر الجديد والكلام الفارغ دة

وانا بتفرج على التقارير الاخبارية اللي تناولت فعاليات المهرجان يووة اقصد المؤتمر طبعا، مقدرتش مركزش على شعار المؤتمر : الفكر الجديد وانظلاقة ثانية نحو المستقبل. اول حاجة لفتت انتباهي- هو كان في انطلاقة اولى نحو المستقبل؟ وانا كنت بايتة برة ولا اية؟

طيب ما علينا ما علينا ركزي على الشعار ككل. تفائلي بالفكر الجديد مثلا ولكن نفسي الشريرة قالت لي سيبك انتي من الكلام الفاضي دة يا سلام بس يا بت لو بتاخدي جنية على كل مرة سمعتي فيها عبارة فكر جديد او انطلاقة نحو المستقبل كان زمانك ولا بيل جيتس في زمانة

... والله عندك حق يا نفسي ويا سلام كمان لو

وفجاة

ان ان انننن

قطع علي بهي الطلعة اسم الله علية وعلى مقامة مستر جمال حبل افكاري الطيبة البريئة بلقطة له على المنصة واقف بثقة زعيم عربي محنك وبيوعد الشعب المصري بتعديلات سياسية واقتصادية اولا وثانيا برفضة لاي تدخل اجنبي في شؤون مصرنا الحبيبة الداخلية بحماسة

منقطعة النظير. وبعد خطبتة العصماء، ايقنت فعلا اننا على وشك دخل مرحلة اخرى بفكر جديد تماما

...فكر التكيـــــــــــــــــــــــــــــة

...فزقططي يا مصر

انسحاب العمالقة

2006-08-30T06:40:00.000-07:00

ومات نجيب محفوظ

ومن قبلة الجميل مدبولي. هل هنصحى في يوم من الايام نلاقي المميزين خلصوا؟ هل هنعيش نتمسح في ذكراهم زي ما بنتمسح في "حضارة السبع الاف سنة"ولا ربنا هيمن علينا بجيل اخر ممن يمتعونا بفنهم وكتاباتهم؟

رحم الله محفوظ ومدبولي

...لبنان يا قطعة سما

2006-07-30T18:48:00.000-07:00

مختلفة جدا مع حزب الله وحسن نصر الله
قرفت من كلمة عاجل بلونها الاحمر المقبض

قرفت من مناظر الدمار والقتل وناس بتعيط والناس المتقطعة والاطفال اللي نظراتهم كلها حيرة ورعب

ومن الجعجعة الفارغة ومن غطرسة امريكا واسرائيل ومن احساسنا بالقهر والضعف واللخبطة

لكن في وسط كل دة عندي احساس وحيد قوي وواضح- احساسي بالتعاطف مع لبنان ومع الدمار والرعب اللي عايشين فية...

... ومن قلبي سلام لبيروت

...وللبنان...قطعة السما

الاء...وحسن البياع

2006-06-30T17:57:00.000-07:00

كنت عايزة اكتب عن موضوع الطفلة المسكينة الاء اللي اتذلت واتبهدلت عشان ادلت برايها في موضوع تعبير

لكن القرف منعني... القرف وتاكدي من ان كل المدونين هيتكلمواعن البنت الغلبانة دي وهيدينوا ويشجبوا بحماسهم المعتاد الجميل فقلت خلاص استنى المصيبة الجاية واكتب عنها وما اكتر المصايب يعني
لكن فجاة خطر لي شئ اخر-قليل من المدونين اتكلموا عن مصحح ورقة الاء واقل ذكروا اسمة
فقلت لنفسي ما تكتبي يا بت اسم الشخصية الفكاهية دي واهو اساهم في فضحه بالمرة
المصحح يا جماعة اسمة حسن البياع

حسن البياع
افتركوا الاسم دة فهو اسم الشصية المثالية التي تمثل المرحلة الجميلة اللي بتمر بلدنا بها
المرحلة زي ما بيقولوا epitome
الراجل دة كلموة في برنامج "القاهرة اليوم" وسالة المذيع: لية بلغت عن ورقة الاء يا استاذ حسن؟

حسن: لانها حضرتك كتبت كلام لا يصح يتقال. فانا رحت بلغت الاستاذ *** (مش فاكرة اسم اللي بلغة مش حفاظا على ماء وجة المتخلف الاخر يعني) فهو قال لا دي لازم نعمل لها بلاغ خاص

المذيع: يا سلام عليك يا استاذ بياع وعلى وطنيتك !!!
حسن: طبعا حضرتك كلنا بنحب مصر (حد يصوت يا جماعة صوتي اتنبح) دي الاء دي زي بنتي!!!!!

المذيع: ولما هي زي بنتك تضيع مستقبلها؟

حسن: لالالالا حضرتك دة هي اللي كتبت كلام لا يصح دي الاء دي زي بنتي!!!

مدرسين من العصر الحجري... وبنت اتعقدت في عيشيتها... وامخاخ متحجرة لا تستطيع التعامل الا مع الاجابات النموذجية
في حلاوة اكتر من كدة!!

الانباء الحلوة باءة: وزارة التربية والتعليم تكرمت وتنازلت ووافقت ان الاء تنجح وتعطفوا واداوها 11 من 14 في التعبير

ربنا يخلي وزارة التربية والتعتيم يا رب !!!

الافراج عن علاااااااء

2006-06-26T12:25:00.000-07:00

تم الإفراج عن علاء اخيراً

حمد الله عالسلامة يا علاء :)

الى الجحيم يا زرقاوي

2006-06-09T21:13:00.000-07:00

سمعت عن خبر وفاة الزرقاوي زي ما الكل اكيد سمع عنة وانتابني فرح غامر لما سمعت الخبر دة
ولما قرات ردود افعال الناس على موقاع مختلفة انتابني الحزن البالغ
الكل بيرثية وفي جنة الخلد يا بطل! باءة دة بطل! دول ابطالنا! دحنا كدة فعلا متطرفين وفعلا جوانا ميول ارهابية عنيفة
اللي يخلينا ننظر لشخص كان بيفجر اسواق كاملة عشان كام عسكري امريكي يبقى في خلل فعلا. بني ادم اعلن مسؤليتة عن عملية تفجير الفندق الشهيرة في نوفمبر الماضي واللي راح ضحيتها 60 شخص بينعم المخرج الكبير العقاد وفي الاخر نقول علية بطل يبقى احنا ناس غريبة فعلا.

والناس منقسمة لقسمين زي ما شفت. اللي شايف ان الزرقاوي كان شخصية وهمية واللي شايف انة كان عميل امريكي. والاتنين نتيجة للنظرية المتخلفة اللي بنعشقها حتى النخاع-نظرية المؤامرة السخيفة. شايفين ان كل حاجة مؤامرة امريكية وكل السلبيات اللي في حياتنا سببها امريكا. امريكا صحيح بلد بتعرف تصطاد في المية العكرة كويس اوي بس اننا نديها اكبر من
حجمها فدة الغلط. دحنا حتى بنتهمها بانها السبب في قتل العرب السودانيين مع ان الجاني والمجني علية مسلمين! اية العتة دة؟وطالما الزرقاوي فرخة بكشك للامريكان اللي بيخبوا وراها قتلهم على راي اتباع نظرية المؤامرة كانوا هيقتلوا لية؟ ما يحافظوا على حياة الكومبارس بتاعهم اولى!

وعودة الى الزرقاوي، فانا شايفة انة كان ارهابي بكل بساطة. ارهابي بيقتل من لا ذنب لة عشان احنا نقول علية بطل بيجاهد المحتل!وان كنت بلعن امريكا على حاجة فانا بلعنها على سياستها الخارجية اللي كانت السبب في ظهور اوبئة زي بن لادن والزرقاوي واتباعهم علينا. فلولا امريكا يا بن لادن مكنش هيبقالك حجة لممارسة التخلف اللي بتسمية جهاد. ربنا ينتقم منك يا مؤسس نظام التفجير الذاتي والقتل العشوائي وربنا ينتقم منك يا زرقاوي بحق كل قطرة دم عراقية اهدرتها بدون ذنب.

أخبار حلوة لولولولولي

2006-05-27T12:29:00.000-07:00

اخيرا اخبار حلوة

تم الافراج عن الاستاذ مالك الحمد لله

الف الف حمد الله عالسلامة يا استاذ مالك

وطلعت في الجزيرة كمان يا سيدي :)

هبقى اكلمكم على تقرير الجزيرة دة المرة الجاية بس للي مشفهموش، فهو هيتعاد غدا (الاحد) الساعة واحدة الضهر وهو عن المدونين المصريين. انصحكم تتفرجوا علية

حمد الله عالسلامة تاني يا استاذنا :) وعقبال كل المعتقلين :)

باتنين جنية دبلوماسية لو سمحت!

2006-05-27T12:23:00.000-07:00

قارفني جدا اللي بيحصل في فلسطين والوضع المتردي هناكقارفني جدا التذكير كل شوية ان في كارثة انسانية هتحصل هناك ومفيش علاج للمرضى والبطالة زادت مش فاكرة مية في المية ولا تلتمية في المية (300%)ومحمود عباس يبلف على الدول العربية على امل ان اي حكومة عربية تتنازل وتقدم مساعدة للشعب الفلسطيني وطبعا لا حياة لمن تنادي لكن اللي لافت نظري جدا حالة العند العالميةيعني الكل بيقول ازاي الدول الاوروبية بقيادة امريكية اسرائيلية تعاقب الفلسطينيين على اختيارهم الديمقراطي؟سؤال جميل وطبعا مش من حقهملكن من الاول خالص عندي سؤال غبي-لية حماس اترشحت اساسا؟ يعني الاتحاد الاوروبي معترف بحماس "رسميا" على انها من المنظمات الارهابية! ودي مش حاجة جديدة دة من فترة بعيدة فطبعا لما منظمة بالنسبة لهم ارهابية تمسك الحكومة من البديهي جدا ان كل المعونات هتتقطع عنها وهتتحارب جدا.طيب هل حماس مكنوش عارفين الكلام دة؟ ولو عارفين انهم هيحطوا شعبهم كلة في موقف حرج يبقى لية يترشحوا اصلا؟مش عارفة عند متهيالي! يعني فين التفكير المنطقي؟ مش قبل ما يترشحوا يقولوا اه احنا هنقطع المعونة عن شعبنا بترشحنا يبقى من الغلط اننا نمسك اي منصب رسمي. ولا هل كانوا معتمدين على دعم من الدول العربية مثلا؟!الى الان انا شخصيا مش شايفة اي لازمة لحكومة حماس لانها مجبتش غير الدمار على الفلسطينيين الغلابىبيبدهشني اكتر غياب الدبلوماسية. يعني من الدبلوماسية ان الحكومة الفلسطينيية تكون حكومة "متعترفش" بكرهها لاسرائيل ودة مش خيانة لكن دبلوماسية! يعني لو في حكومة فلسطينية طلعت تصريحات ان احنا معترفين بحق اسرائيل ويا سلام دول حبايبنا واصحابنا وفي نفس الوقت تشجع حماس وكل حركة معادية لاسرائيل. هتخسر اية؟تكون اخدت معونات وبتساعد شعبها وفي نفس الوقت بتحارب اسرائيل لكن بصفة غير رسمية لكن التصريحات النارية مش اي حد يقدر عليها ومش اي حد يقولها. لازم يكون في اعتراف اننا الجهة الاضعف فبالتالي نعمل اللي احنا عايزينة لكن بصفة غير رسمية لكن رسميا فانا زعلان من حماس الوحشين. اية المشكلة في دة؟الحكاية دي باءة موجودة في الغرب جدا. يعني مؤخرا كان في برنامج مستضيف متحدث باسم الاتحاد الاوروبي. الراجل كان باااااارد جدا جدا وبيتسال اسئلة في منتهى الاستفزاز وهو في منتهى البرود وكل ردودة في منتهى الدبلوماسية ومش ممكن ابدا تستشف منة اية تفكير الاتحاد الاوروبي او اية مشاعرهم تجاة فلسطين. يعني مثلا اتسال ازاي تعاقبوا فلسطين على اختيارها الديمقراطي وانتوا من المناديين بالديمقراطية؟ راح رد بكل برود احنا مش ضد الشعب الفلسطيني لكن ضد اتجاة حكومة حماس لانها من المنظمات اللي بنعتبرها ارهابية لكن الشعب الفلسطيني احنا مش ضدة!فسالوة طيب هل انتوا بموقفكم دة بتنحازوا للجانب الاسرائيلي؟بردة بمنتهى البرود لا طبعا احنا معترفين بحق التواجد للطرفين واعتراضنا على حماس سببة انهم ضد التواجد المسالم للطرفين!وشكرا يا فندم شكرا لكم على استضافتي والبرنامج خلص بمنتهى الدبلوماسية ومن غير ما يتسبب بالمشاكل للاتحاد الاوروبي!لكن احنا سبحان الله

حتى لندن

2006-05-16T06:18:00.000-07:00

المظاهرات ضد حبيب الملايين وصلت لندن لولولولولولي

لقراءة اللي حصل من هنا

من الحاجات اللي لفتت انتباهي- البوليس هناك نظملهم المظاهرة وحدد لهم المكان اللي يوقفوا يتظاهروا فية زي الامن المركزي بتاعنا ما بيعمل بالضبط طبعا

ووقفوا يسمعوا المصريين وهما بيشرحولهم هما لية بيتظاهروا واية سر غضبهم

... يا رب بدلنا تبقى بالمستوى الحضاري دة في يوم من الايام

السي ان ان دخلت بيتنا يا ولااااااااااا

2006-05-15T23:23:00.000-07:00

بين ويدمان من السي ان ان عمل تقرير عن اعتقال المدونين المصريين لمعداتهم للنظام البائس

فضيحتك بقت بجلاجل ياسمك اية ههههه

اضغط هنا عشان تتفرج

الالم

2006-05-11T15:55:00.000-07:00

ياااة

الالم الصافي

العنيف

كانة كهرباء بقوة الف فولت

وينسحب تدريجيا ويسيب حالة هذيااان

.....

اعتقال جديد

2006-05-09T10:39:00.000-07:00

اعتقلوا المدون علاء يوم الاحد- صاحب البلوج الشهير جدا

Manal and Alaa's bit bucket

الوعي المصري ناشر كلام مفزع جدا عن الاعتقالات

حسيت بفزع شديدواسى شديد وانا بقرا المكتوب هناك

لك الله يا بلد

احنا معاك يا مالك

2006-05-04T11:41:00.000-07:00

لما عرفت خبر اعتقال اخونا مالك ذهلت جدا وزعلت جدا مع اني معرفهوش معرفة شخصية

مجرد متابعة لمدونتة وقبل كدة لكتاباتة في قهوة كتكوت
وقعدت افكر اذا كنت انا اللي معرفهوش انتابتني كل الاحاسيس دي امال اهلة حالتهم اية؟ ربنا يصبرهم

والمؤسف اكتر الاحساس بالعجز. بان كل اللي اقدر اعملة اني ازعل وادعي

ولما شفت الصورة اللي فوق دي المنتشرة حاليا في معظم البلوجات سالت نفسي احنا معاه ازاي؟

انا شخصيا مش معاه. لا انا حاسة باللي هو حاسس بة ولا عايشة في الظروف اللي هو عايشها! ابقى معاه باية؟ بقلبي زي ما بيقلوا في الافلام

طب وانا قلبي دة هيفيدة باية لو كان تحت ضغط نفسي؟ لو كان خايف؟ لو كان بيهان؟

احنا مش معاك يا مالك

احنا مجرد متعاطفين

مش معاك لاننا معجونين بالجبن والانهزامية

لان مش كلنا عندة شجاعتك

مش كلنا يقدر يقف ويقول لا زيك

مقدرتش احط الصورة بسبب عبارة "احنا معاك" يا ريت حد يعمل لنا واحدة بتقول

"احنا متعاطفين معاك"

ربنا يفك اسرك

مليون 95!! دول فكة يا ناس

2006-05-04T11:00:00.000-07:00

يا سلاااام عالجمال والفن
فن فن فن فعلا يعني
اللوحة دي لبيكاسو اللي مش فاهمة لحد دلوقتي لية بيقدم على انة "الفنان العظيم"
اللوحة دي اتباعت انهردة ب 95 مليون دولار
!!!!!!!!!!
'Dora Maar with Cat' اسمها
نفسي بس اشوف الشخص اللي اشتراها بالمبلغ المهول دة واقول لة انت سخن يا حبيبي؟
طول عمري اشوف لوحات الراجل دة وافكر ان الفن الحقيقي هو اللي الكل يفهمة ويتلذذ بة. يعني محدش محتاج يكون دارس موسيقى عشان تسحرة اغاني فيروز لانها حاجة بتوصل للروح على طول مش محتاجةشهادات ومقدمات لكن لوحات بيكاسو اظاهر لازم اكون دارسة الرسم السريالي ولا مش عارفة اية الاسلوب الفذ اللي ابتكرة كان اسمة اية عشان افهم
واللوحات اللي فعلا فيها فن هي اللي اي حد يشوفها ويقول الله اية الجمال دة

لكن لوحات مستر بيكاسو اقول الله هو كان مغمض عينة وهو بيرسم ولا اية؟
اللوحة فعلا اول ما شفتها قلت دة راسم ساحرة شريرة القدر عاقبها بلخبطة خلقتها
بس دة دي المفروض واحدة من عشيقاتة. شكلها كان كدة؟!
انا من وجهة نظري اللوحة دي بتعبر عن حاجتين: عن السفة الشديد وهي تخليد للمقولة العبقرية رزق الهبل عالمجانين !

ديموكراتية

2006-04-29T03:43:00.000-07:00

أخبار تشل كالعادة

اعتقلوا 15 شخص من المعتصمين من بينهم مدونين زي الاستاذ مالك و الاستاذ محمد عادل

ربنا يفك اسرهم

ومنكوا لله يا بعدا

ودي تغطية الوعي المصري لفض الاعتصام

اظرف حاجة ان الامن المصري قطع العلم

ايون العلم المصري! هههههههههههه

شر البلية ما يضحك صحيح

اخر الاخبار: قانون الطوارئ اتمد كمان سنتين

ههههههههههههههههههههههه

سفالة وانفجار

2006-04-25T12:48:00.000-07:00

حاسة ان في يوم من الايام هتجيلي سكتة قلبية واموت من اللي بيحصل فيكي يا بلدي

تم الاعتداء على المعتصمين عند نادي القضاة وتم التعدي على رئيس محكمة واخوة واتضربوا ضرب مبرح

مش عارفة لية بيتم اتلعامل مع المعتصمين على انهم اكياس زبالة شاغلة الطريق

رئيس المحكمة في برنامج العاشرة مساء اشار لكدمة في وجهة وقال انها ضربة جزمة

رئيس المحكمة! رئيس المحكمة يا غجر! فين هيبة القضاة والقضاء؟

أما بخصوص التفجيرات اللي وقعت في دهب فانا منتظرة بفارغ الصبر اعرف مين المختل الوحش اللي

عمل كدة وكلي امل في تمديد تفعيل قانون الطوارئ عشان احس بالطمئنينة!

عمرو خالد

2006-04-24T13:29:00.000-07:00

اكتشفت انهردة اني مكتبتش اي بوست عن الاستاذ عمرو خالد

يعني الواحد اتكلم عن زبالة المجتمع ونسي يتكلم عن الناس الراقية اللي عملت تغيير

استاذ عمرو خالد كان اول داعية اسمع لة شرايط. كل محاولاتي لسماع شيوخ غيرة كانت بتبوء بالفشل لاني كنت بحس انة بيزلوني مش بينصحوني- او كانوا بيدوني الانطباع اني واحدة كافرة وانهم احسن مني لسبب ما- ودة كان بينفرني جدا من سماعهم

لحد ما سمعت الاستاذ عمرو.متهيالي اول شريط سمعتة كان شريط الصلاة ومن بعدة انتظمت في الصلاة الحمد لله. اللي خلى الراجل دة يعلم في نفوس شباب كتير متهيالي سبب واحد-السماحة

فعلا حاجة مهمة جدا لما تون بتكلم حد انك تكلمة بسماحة ورقة وتحسسة انة صحيح غلطان بس الامل في ربنا كبير. ودة اللي الاستاذ عمرو عملة

واللي اثر في انا شخصيا عدم تركيزة على مسالة العذاب. يعني مكنش بيذكر عذاب القبر قد ما كان بيذكر نعيم الجنة. ودة متهايلي ذكاء شديد منة لان انا مثلا من الناس اللي الكلام عن عذاب القبر وعذاب النار مش بيهزني قد ما بيكابني. بحس بعد ما بسمع عن العذاب بالكابة والحزن. لكن لما بسمع عن نعيم الجنة وحب ربنا للمصلين، دة بيحفزني اني اصلي واتقرب من ربنا.

متهيالي الناس اللي استجابت لعمرو خالد من النوع دة. يمكن ميكونوش كدة لكن معظم اللي بيهاجموا الاستاذ عمرو بيهاجموا اسلوبة "الرقيق زيادة" حسب تعبيرهم. يعني في ناس مش بتستجيب غير لما تخاف. وفي ناس تستجيب لما تحب

الاستاذ عمرو باسلوبة السلس اثر في انا شخصيا جدا. وشرايطة عن الصدق والامانة غيرت في حاجات كتير.

اسلوبة الراقي في الرد على اعنف الانتقادات والتجريحات كان بيدهشني-مجرد ابتسامة بسيطة وتعليق مهذب. مثال حي على "واخفض جناحك للمؤمنين". ربنا يكرمة

والجميل انة بيربط كل حاجة بالدين-الادب بالدين، الاتيكيت بالدين، حتى اللعب والتسلية بالدين. في حين ان معظم من حاولت اني اسمعهم الحاجة الوحيدة اللي بيربطوها بالدين العبادات. كنت بحس وانا بسمعهم انهم عايشين في برج عاجي يسكنة ناس خارقين، ملائكة. والاستاذ عمرو قال اننا كلنا ممكن نكون مؤمنين بجد واحنا بنخرج ونتفسح ونعيش حياتنا. ودة كان شئ جميل

فيا استاذ عمرو يا مثال الرقي والايمان...شكراً

اوفففففففففففففففففففففففففف

2006-04-18T12:26:00.000-07:00

مكنتش عايزة اكتب عن السفالة والتخلف اللي حصل في اسكندرية

بس حاسة فعلا اني هموت من الغيظ فقلت اكتب واطلع زهقي وغضبي في اي حاجة

اولا مش مصدقة حكاية واحد مختل واللي طلع التفسير دة هو اللي مختل

هو اي مشكلة نلزقها في مختلين؟ اما بلد مختلة صحيح!

اذا كان قالوا ان كل كنيسة كانت بتبعد عن التانية بتاع 15 كيلو اية رجل المستحيل!

غباء في غباء وتسطيح في تسطيح

مش عارفة انهي مسلم اللي يرضى يعمل كدة

يشوه اسم الدين بالقذارة دي ويروح يضرب ناس ملهمش سلطة زية بالضبط

وداخل ليهم دخول الفاتحين والله اكبر! كتك مصيبة تاخد امثالك يا متخلف!

اللي استغربت لة كمان ردة فعل المسيحيين

انا طبعا متفهمة جدا غضبهم وحزنهم ولهم كامل الحق في الغضب والثورة بس لية تتهموا كل المسلمين؟

لية التخلف دة انتوا كمان؟ ما تصدقوا تيجي فرصة عشان تشتموا في الازهر والاسلام و اسطوانة احنا السكان الاصليين وانتوا دخلتوا علينا! الاسلام كان داخل داخل وعلى الاقل المسلميين لا عذبوكوا ولا طلعوا عنيكوا زي الرومان! لية الكراهية الشديدة دي من الطرفين؟ لا احنا طالعين ولا انتوا طب ما نتعايش مع بعض وكل واحد يتقبل دين التاني ويتنيل يسكت!

خلاص مبقاش الحل اننا نشوف قس وشيخ بيسلموا على بعض والهلال مع الصليب والكلام اللي مش جايب همة دة. يلا نتصارح باءة وكل واحد يقول اللي في قلبة بجد. نصفي مشاعرنا تجاة بعض ونتصارح فعلا

وكل اللي عندة شحنة غضب ميوجهاش للطرف التاني اللي غلبان وقرفان في عيشتة زية بالضبط.

يوجهها فوق فوووووق

اللي نقلة جار القمر في مدونتة اذهلني وزعلني وصدمني وكل حاجة زي:

على سور الكنيسه استمع بارهاف الى احاديث الناس .. سيده هستيريه
تصرخ : ده دين سفك دماء .. احنا مش بنقتل ولا بنعمل حاجه .. دول مجرمين
..
ترد عليها اخرى : ربنا بينتقم منهم .. في الحج بيموتوا و في البحر
بيغرقوا
..
يصل لي كلام آخر : البلد دي بتاعتنا و هما اللي جم ..احنا بنمارس
عبادتنا في الخفاء .. و دول بتوع مظاهر .. الإسلام ده دين مظاهر
..
يحادثني
كهل : البوليس منهم .. دول عصابه في بعضيهم .. احنا نروح فيهم فين
..
اعود
الى السيدة الاولى .. تتحدث عن ضعف القرآن او ماشابه : خليهم بس يعرفو يفسروا آيه
واحده .. خلي حد يورينا انه مقتنع و فاهم اللي داوشينا بيه ليل نهر ده
..
رجال تصرخ بدق جرس الكنيسه .. و اخرى تهمس لابنتها : ايوه زي ماهم
داوشينا بالاذان ليل نهار كده
تسألها جارتها عن المسجد المقابل .. تخبرها انهم
لن يستطيعوا صلاة العصر او المغرب : خليه مقفول كده
لا حول ولا قوة الا بالله فعلا. يا مسلمين ياللي بتعملوا كدة كتكم القرففففففففف

اخيرا عملوا حاجة

2006-04-15T06:02:00.000-07:00

تضامنا منا مع الشعب الفلسطيني اللي بيعقابة الغرب على اختيارة الدميقراطي وعلى التفاعل العربي المزري، بنشر هنا الحساب البنكي اللي الجامعة العربية افتتحتة لجمع التبرعات للعب الفلسطيني (اخيرا عملوا حاجة)

: رقم الحساب اهو

بنك القاهرة/ فرع الجامعة

رقم 9365/601/32 للتبرعات بالدولار

وبرقم 9818/501/32 للتبرعات بالعملة المحلية

777-777-7

بنك مصر الدولي

مصر

شكرا لجحا. معرفتش الموضوع غير من مدونتة

:تحديث

حساب البنك العربي اتلغى لسبب ما وبدالة بنك القاهرة

~My baby shot me down~

2006-02-27T14:46:00.000-08:00

I was five and he was six
We rode on horses made of sticks
He wore black and I wore white
He would always win the fight

Bang bang, he shot me down
Bang bang, I hit the ground
Bang bang, that awful sound
Bang bang, my baby shot me down.

Seasons came and changed the time
When I grew up, I called him mine
He would always laugh and say
"Remember when we used to play?"

Bang bang, I shot you down
Bang bang, you hit the ground
Bang bang, that awful sound
Bang bang, I used to shoot you down.

Music played, and people sang
Just for me, the church bells rang.

Now he's gone, I don't know why
And till this day, sometimes I cry
He didn't even say goodbye
He didn't take the time to lie.
Bang bang, he shot me down
Bang bang, I hit the ground
Bang bang, that awful sound
Bang bang, my baby shot me down...

:)مش انا اللي كاتباها

والله احنا عسل ههههههه

2006-02-24T12:53:00.000-08:00

الفلو جييييييييية

2006-02-20T13:31:00.000-08:00

زي ما الكل توقع اسعار اللحمة ارتفعت بطريقة خزعبلية

بيقولوا في التلفزيون كيلو اللحمة ضرب رقم قياسي-بسبعييييين جنية

اغلى من السعودية والكويت والمانيا و من انجلترا

وفي كل الدول دي دخل الفرد اكبر من دخل الفرد المصري

طب انا مش فاهمة فعلا الجزاريين دول ملتهم اية

الناس اللي بتستغل الظروف عشان تكسب دي معرفش يستاهلوا اية

حاجة تقرف فعلا

ومش بس اللحمة دة البطاطس والبسلا والقلقاس!!! طب القلقاس مالة

رئيس اتحاد الغرفة التجارية كان على التليفون مع مذيع وبيسالة على القلقاس قال لة اصل القلقاس سيد

!الناس

!بينكت

لا وواحد عبقري راح رمى الفراخ في النييييل

فعلا الشعب المصري دة طول عمرة ظريف

مش فاهمة والله الناس تاكل بعض ولا تاكل في نفسها ولا تستحمل استظراف ولا تعمل اية

حاجة تقرف

2006-02-06T04:53:00.000-08:00

حرقتوا السفارة الدنماركية الحمد لله

رجعتوا لنا كرامتنا ودافعتوا عن الرسول علية الصلاة والسلام وارتحتوا

اثبتتوا بالدليل القاطع اننا غوغائيين ومتطرفين وازلتوا اي تعاطف كان ممكن العالم يحس بية نحيتنا

نصرتوا الدين؟

طب الحمد لله

اسمحوا لي اهديكم كلمة واحدة طالعة من اعماق اعماق قلبي

يا بهااااايم

يلا ندافع بطريقة تانية

2006-01-31T15:07:00.000-08:00

مش هقاطع الدنمارك

مش هقاطع

مش مقتنعة ابدا ان الشعب الدنماركي كلة يتعاقب على جهل شوية رسامين ميعرفوش اي حاجة وكانوا بينفذوا اللي الجريدة طلبته منهم.

لفت انتباه جدا قد اية احنا امة نساية. نسينا ان الدنماركيين كانوا من الشعوب اللي ضد الحرب على العراق واللي واقفة جنب الفلسطينيين على طول الخط

وفي سانية انقضينا عليهم بكل ضراوة عشان اهانوا رمز الاسلام

وانا مش بقلل ابدا من فداحة اللي حصل

واي مسلم لازم يتضايق جدا من اللي اتنشر

بس اللي يضايق اكتر ان الناس دي مش عارفة عننا اي حاجة فاي حاجة

فاكريننا ناس جاهلة بنتبع دين دموي بيامر بقتل الابرياء وهدم المباني

هو دة اللي يزعل

لان الناس دول لو يعرفوا الدين الاسلامي الصحيح كان عمرهم ما هينشروا الصور دي

فبالتالي الغلط غلطنا احنا اننا مبنكلفش خاطرنا ونروح نقول لهم احنا مين وديننا دة اية وان اسامة بن لادن شخص مجرم لا يمثلنا وافعالة الهوجاء لا تمثل الاسلام في شئ

لكن بدل ما نعمل كدة وكالعادة اخدتنا الجلالة وانتفضنا ولا يا رسول الله بابي انت وامي وهما اللي ابتدوا والبادي اظلم يا رب

وتحس اننا لو طلقنا المسلمين على الشعب الدنماركي هيدبحوا فيه ويزيلوة من على وجة البسيطة

مش راضيين نفهم حاجة بسيطة جدا-الناس دي الديمقراطية عندهم فوق كل حاجة. الصحافة عندهم لا تمثل الحكومة. لكن لاننا عايشين طول عمرنا تحت كبت حكوماتنا، متصورين ان كل الشعوب زينا ومش متخيلين ان ممكن رئيس تحرير يكون لة نفوذ اكبر من رئيس الوزراء زي ما السفير الدنامركي صرح مؤخرا

ومع كدة نقعد نطالب بنفس الطلب-عايزين الحكومة تعتذر.ومنتظرين من حكومة غير مسلمة انها تعتذر وتدافع عننا في حين ان حكوماتنا المسلمة معملتش الهوااا

والحكومة تقول لنا يا جماعة احنا غير مسؤلين عن الصحيفة ورئيس الوزراء قال انا عن نفسي مش موافق على اللي الصحيفة نشرتة لكن مقدرش اعتذر باسمهم لان دة مش من حقي

حاجة على جنب كدة-الديمقراطية حلوة اوي. بتدي الناس ثقة في ان حكومتهم مش هتخذلهم.بتديهم الثقة انهم يقدروا ياخدوا قرار

نرجع باءة لموضوعنا

اللي انا مستغرباه اننا بندافع على رمز الاسلام المتمثل في الرسول علية الصلاة والسلام بكل ضراوة

في حين ان القضايا اللي الرسول عاش ومات عشانها بتتهان كل يوم وكلنا بنتفرج في سكوت

كل يوم اطفال مسلمين بيموتوا ونساء مسلمات بيترملوا ويغتصبوا واحنا عارفين وساكتين

مبنقاطعش لية اسرائيل بالضراوة دي؟ احنا فعلا ناس غريبة جدا

وبعدين اية اخرة المقاطعة؟يعني قاطعنا شوية واتبسطنا بنفسنا طب وبعدين؟

ارتحنا اننا خسرناهم عشرمليون مليار

لعلم كل اللي قاطعوا الدينمارك 60% من منتجاتهم بتتسوق في اوروبا. يعني خسرناهم شوية بس مش هنهدم اقتصادهم ولا حاجة

ولكل الدنماركيين-متخافوش كلها يومين وهننسا ونرجع نشتري زبدتكم وجبنتكم وهيبقى الوضع على ما هو علية من غير ما نحاول نصلح صورتنا عندكم.

دحنا بالعكس بدل ما نستغل الموقف عشان نصلحها بوظناها اكتر بتدمير مواقعهم ومقاطعة شعب كامل ملهوش دعوة باي حاجة. لا وكمان نعمل اية اكتر بنحرق علمهم. تلاقيهم بيتفرجوا علينا وبيقولوا هما بيعملوا اية المهابيل دول؟

ويمكن كمان لو كان في ناس متعاطفة معانا تنقلب ضدنا من التخلف بتاعنا دة

افرح بينا يا رسول الله اوي. اثبتنا تخلفنا وهبلنا واننا تطورنا وبقينا نحكم على شعوب كاملة من مجلاتهم

وفالحين بس نقول لهم يا جماعة احنا مش كلنا ارهابيين ومش راضيين نقبل فكرة ان هما كمان مش كلهم كارهيين للاسلام

وبدل المقاطعة تعالوا ندافع عن نبينا بطريقة تانية لعل وعسى

2006-01-21T06:02:00.000-08:00

بالرغم من حالتي النفسية السيئة، الا اني مقدرتش مضحكش لما شفت الصورة دي اللي بتثبت ان الشعب

المصري ابن نكتة فعلا
اسيبكم مع الصورة

الصورة من عند التنين الأخضر

ذكريات الصباح

2006-01-13T19:52:00.000-08:00

الساعة الان السابعة صباحا

يستعد اخوتي للذهاب الى المدرسة

احسدهم كثيرا

وتنتابني رغبة عارمة ان استعد معهم واقفز داخل الباص الذي سيكون بوابتي الزمنية لياخذني الى عالمي القديم والى اشخاص افتقدتهم كثيرا

انظر من النافذة واتذكر الماضي بمرارة لا اعلم سببها

العيد فرحة مااااء

2006-01-10T12:58:00.000-08:00

فرحت جدا بقدوم عمي للتعييد معنا
ضقت كثيرا بالوحدة التي عشنا فيها سنين طويلة نفرح ونحزن في صمت
وهطلت الامطار غزيرة ونحن في الطريق لاستقبال عمي فازدادت الدنيا جمالا
اشعر دائما بالراحة مع المطر خاصة اذا صاحبة صوت فيروز الشامخ
واكلنا اكلة "خفيفة" جدا جدا وها نحن جالسين حول التلفاز مع عمي العزيز الذي اضفى على العيد طعم وجود الاقارب اللذيذ
------------------------------------------------------------------------------------------------

كل عيد بيفكرني اني كبرت
مبحبش افتكر اني بكبر
احساس العيد بيوصلهولي بطريقة غير مباشرة
مباتش عايزة انزل اشتري هدوم العيد مثلا-هو انا عيلة؟
ولا عايزة اروح الملاهي-هو انا عيلة؟
ولا عايزة اغني مع صفاء ابو السعود العيد فرحة واجمل فرحة-هو انا عيلة يا ناس؟
ومقدرش اقف في صف طويل عريض عشان اركب لعبة حتى لو نفسي اركبها-خلقي باءة ضيق وعمال يضيق كل عيد عن التاني
مش اي حاجة بقت تدخل علي الاحساس بالفرحة خلاص
مش عارفة لية قلوبنا بتقسى اوي كدة ونفوسنا بقت من الوحاشة لدرجة انها متقدرش تستمتع بالحاجات البسيطة في الحياة زي العيد
:بالنسبة لي على الاقل، فرحة العيد بتجيلي من 3 حاجات
صلاة العيد الصبح بدري والناس كلها نازلة تصلي وصوت التكبير بيرن في الشوارع كلها والسما صاااافية ولسا مفيش شمس تعكر علينا. وانا ببص على وشوش الناس لقيت المعظم مبتسم واستغربت من ابتساماتهم اللي ملهاش سبب واضح لحد ما صوت من جوة قال

لي بيبتسموا عشان ان مبسوطين بالعيد يا كئيبة اية المشكلة؟

وصليت على سجادة كبيرة برة المسجد انا واختي والناس ما شاء الله كانوا كتيييير اوي بس لقينا مكان سبحان الله والجميل اوي ان الاطفال

جايين بكامل زينتهم-لابسين فساتين وعمالين يضحكوا وشكلهم بس بيبعث في الواحد احساس بالتفاؤل وبيخليني ابتسم من غير ما احس ودة متهيالي لوحدة كفاية اوي.
شفت صديقة قديمة كانت معياي في المدرسة وكان نفسي اروح اسلم عليها واحضنها لكن الزحام للاسف حال ما بيني وبينها
لكن الغريب اني اول ما شفتها انتابتني رغبة عارمة في البكاء وحنين جارف الى الماضي
ساعات حنيني للماضي بيكون عنيف لدرجة بتخوفني
غريبة اوي الايام الحلوة اللي بنعيشها ومنحسش بها غير لما تعدي ونبقا هنموت ونرجع سانية واحدة
قعدت ابص على وشها وهي بتتكلم مع اللي كانت جاية معاهم ونفسي عيتها تقع علي بالغلط لكن محصلش للاسف
وصلينا في الهواء الطلق الجمييييل اوي وكان نفسي ممشيش
رغيت كتير ولسا في حاجتين كمان مقلتهمش من اللي بيفرحوني بالعيد
تاني حاجة بتفرحني اوي المطر اللي تقريبا دايما بيزورنا في العيد كانة بيجيب معاة وعد بالخير ويرغمنا على التفاؤل وعلى الامل ان اكيد بكرة هيكون احسن وبحس لما الدنيا تمطر ان الدنيا
كدة crisp
شعور جميل ومش هقدر اوصفة وخلاص
تالت واخر حاجة العيدية-صحيح الفرح بالعيدية شعور طفولي لكن بحمد ربنا ان لسا في شوية طفولة قدرت تعيش فيٌ.
بس كدة

وكل سنة وكللللنا طيبين وبخير :)

عدنا

2006-01-10T12:50:00.000-08:00

عدنا من ثلاثة ايام من سفرية قصيرة
وانتابني شعور غامر بالغربة اول ما نزلت من الطيارة
سخيف اوي الاحساس بالغربة
احساس كنت فاكراة خلاص اندفن تحت سنين الغربة والسفر
مكنتش فاكرة اني هحس بحنين المغتربين الجدد
لكن اكتشفت ان احساسنا بالغربة عن بلادنا واشتيقانا الجارف لها احساس مبيتدفنش ابدا
وبيبقى في قلب اعتى مغترب حتى لو بعد عن بلدة الف سنة
ولقيتني كارهة الشوارع الهادئة النظيفة زيادة عن اللازم
ونفسي في ناس بتزعق في الشارع وواحد قاعد في عز البرد يشوي درة وفي شارع عدد العربيات فية بعدد نجوم السما
او في أي حاجة تفكرني ببلدي والسلام
واحتلتني حالة اكتئاب وملل فظيعة صاحبها صداع دمة تقيل
فقررت ادخل انام قبل ما حالة الاكتئاب تقلب على نوبة عياط
ودخلت انام وانا بدندن بيا هوى دخل الهوى خدني على بلادي

انشكاح أو ارتياح سمها ما شئت

2005-12-13T22:08:00.000-08:00

اكتشفت عالم التدوينات أو البلوجات من فترة قصيرة نسبياً

وذهلت من كمية البلوجات او السبيسات اللي موجودة-بلوجات من جميع الالوان والجنسيات وكل بلوج فية أفكار مختلفة وساعات عقائد مختلفة-أفكار شائكة، ثورية، منطقية،مهلبية المهم ان في شباب بيفكر وبيكتب ويبدع-كل واحد في سبيس من ضمن الاف السبيسات في عالم افتراضي رقمي

في سبيسات فيها قصص قصيرة وأشعار وتأملات حقيقي مبهرة وسبيسات تتميز بالتحليل السياسي العميق جدا من شباب في العشرينات عندهم وعي فظيع وسبيسات تانية لصور جميلة التقطتها عدسات مصور شاب و الاف السبيسات بالاف الاتجاهات لو قعدت اوصفهم هحتاج بلوجات وبلوجات

وجولتي الواسعة في عالم البلوجات الأوسع اضافتلي حاجات كتير لكن اهمها انها اضافتلي احساس غامر

بالارتياح والسعادة اننا لسا بخير فعلا

وان مش كل الشباب ضايع ولا كله تافة ولا كلة

... خايف

نهى الزيني

2005-12-13T12:56:00.000-08:00

وأسأل على راي مفيد فوزي-لية عالم البلوجات متقلبش على الدكتور نهى زي ما اتقلب على عبد الكريم؟

الفقي انكشف يا بني ادمين

لا وبيقول في لقاء تلفزيوني مع برنامج «على الهوا» بأن الانتخابات زورت لمصلحة الاخوان، إن بعض القضاة لهم ميول إخوانية

يا اخييييييييييييي يا ابو سبع تلاف صوت يكسب خمسة وعشرين الف صووووت يا اخيييييي

تعالوا اتشمسوا عندنا

2005-12-08T15:13:00.000-08:00

في بلدنا العزيزة، يتشمس المواطنون بعد الإدلاء بأصواتهم بكل حرية ونزاهة وديمقراطية
ودة يا سادة ان دل على شئ فيدل على سعادتهم الجمة وانشكاحهم الغامر

البلطجة هي الحل

2005-11-25T22:26:00.000-08:00

يا ما في الترعة صناديق صحيح هاهاها ويا ما حرامية بجحيييين

وياما ستة الاف صوت يكسب خمسة وتلاتين الف صوت

وحاجة هباااب الحمد لله و فضايح تشرف بجد وحقوق انسان تومااااااام

أحسن حل هو الضحك عشان نتجنب الجلطات

يلا نضحك على خيبتنا التقيلة هاهاهاهاهاهاهاهاهاهاهاهاها

العبط العالمي

2005-11-12T13:41:00.000-08:00

زهقت من اللي بيحصل في العالم

حالة من الغوغاء واللامنطقية في كل مكان ومغطية على كل الاحداث زي الضباب الغلس

كنت قلت مش هتكلم في السياسة عشان زهقت فعلا من كمية الالم والاحباط اللي بتسببة لي

بس مقدرش مدونش رايي بخصوص اللي حصل في الاردن ومش هتكلم في السياسة لان الحكاية انسانية بحتة

انا مش فاهمة الفندق دة اتضرب لية اصلا. عشان احتمالية وجود مش عارفة اية وكلام ميدخلش دماغ عيال

اية اللي بيحصل بس؟ ولية ناس رايحة فرح يتقلب غم ودم

واللي المني جدا وفاة المخرج الكبير مصطفى العقاد

باءة الراجل اللي اخرج فيلم الرسالة وعمر المختار وحاول يروج لفكرة ان الاسلام دين التسامح تكون نهايتة كدة؟

سخرية القدر يمكن

مات على ايد اللي بيدعوا الاسلام

ناس متخلفة ودموية فعلا ومش عارفة دول ربنا هيعاقبهم ازاي؟ اية العقاب اللي يشفي غليل كل الاسر المنكوبة دي؟ اية؟

باينا نسمع ارقام كتير اوي-20 في فلسطين ولا مية في العراق وخمسين في الاردن

حاسة اننا كوننا مناعة ضد التعاطف مع الموتى

واننا سَنة سَنة بنفقد ادميتنا

وسَنة سَنة بنفقد فكرة ان دم البني ادميين شئ مقدس جدا عند ربنا على الاقل

وروحهم غالية عند ربنا على الاقل

وقبل ما نكون مناعة ضد الارقام اللي بنسمعها كل شوية نفكر في الارقام دي على انهم بشر لهم اهل مش فاهمين واولاد مش فاهمين واخوات مش فاهمين

وعالم كامل مش فاهم هو في اية

من فترة كدة كنت بسال نفسي سؤال غريب-مين الشخص اللي بجد بكرهة؟ ملاتش اجابة وقتها

قلت يمكن في ناس مش بحبها او مش بحب شخصيتها لكن مفيش حد بحس نحيتة بالكراهية المطلقة

لكن اكتشفت ان طبعا في ناس بكرههم من قلبي-بكرة الزرقاوي وبن لادن و تنظيم القاعدة (عارفة انة تنظيم مش ناس بس اهو ينفع بردة)- دي اسماء لما بسمعها بحس بالكراهية، بشوف الدم

لزوال الدنيا أهون على الله من قتل رجلٍ مسلم

كل المسلم على المسلم حرام: دمه وماله وعرضه

والله المفروض العبارة دي تتبروز-كل المسلم على المسلم حرااااااااااااااااااااااااااااام حرااااااااااااااااام

And yet another lovely poem...

2005-11-12T08:28:00.000-08:00

Bird On The Wire
By Leonard Cohen

Like a bird on a wire,like a drunk in a midnight choir
I have tried in my way to be free.
Like a worm on a hook,
like a knight from some old fashioned book
I have saved all my ribbons for thee.
If I, if I have been unkind,
I hope that you can just let it go by.
If I, if I have been untrue
I hope you know it was never to you.

Like a baby, stillborn,
like a beast with his horn
I have torn everyone who reached out for me.
But I swear by this song
and by all that I have done wrong
I will make it all up to thee.
I saw a young man leaning on his wooden crutch,
he said to me, "You must not ask for so much."
And a pretty woman leaning in her darkened door,
she cried to me, "Hey, why not ask for more?"

Oh like a bird on a wire,
like a drunk in a midnight choir
I have tried in my way to be free.

And another poem that I like...

2005-11-10T14:04:00.001-08:00

Suicide in the Trenches
By Siegfried Sassoon

I knew a simple soldier boy
Who grinned at life in empty joy,
Slept soundly through the lonesome dark,
And whistled early with the lark.

In winter trenches, cowed and glum,
With crumps and lice and lack of rum,
He put a bullet through his brain.
No one spoke of him again.

You smug-faced crowds with kindling eye
Who cheer when soldier lads march by,
Sneak home and pray you'll never know
The hell where youth and laughter go.

A poem I really like...

2005-11-10T14:04:00.000-08:00

Dulce et decorum est
By: Wilfred Owen

Bent double, like old beggars under sacks,
Knock-kneed, coughing like hags, we cursed through sludge,
Till on the haunting flares we turned our backs
And towards our distant rest began to trudge.
Men marched asleep. Many had lost their boots
But limped on, blood-shod. All went lame; all blind;
Drunk with fatigue; deaf even to the hoots
Of disappointed shells that dropped behind.

GAS! Gas! Quick, boys!-- An ecstasy of fumbling,
Fitting the clumsy helmets just in time;
But someone still was yelling out and stumbling
And floundering like a man in fire or lime.--
Dim, through the misty panes and thick green light
As under a green sea, I saw him drowning.

In all my dreams, before my helpless sight,
He plunges at me, guttering, choking, drowning.

If in some smothering dreams you too could pace
Behind the wagon that we flung him in,
And watch the white eyes writhing in his face,
His hanging face, like a devil's sick of sin;
If you could hear, at every jolt, the blood
Come gargling from the froth-corrupted lungs,
Obscene as cancer, bitter as the cud
Of vile, incurable sores on innocent tongues,--
My friend, you would not tell with such high zest
To children ardent for some desperate glory,
The old Lie: Dulce et decorum est
Pro patria mori*.

*Dulce et decorum est Pro patria mori: it's sweet and right to die for your country.

Recipe for Boredom

2005-11-10T13:55:00.000-08:00

When bored with nothing better to do
A pen and paper are the clue
Cut the paper into specks
And rub the pen with a fab-ric
And watch without much ado
As the specks jump to you…

يااااااا رب

2005-11-10T13:24:00.000-08:00

كنت ناوية متكلمش في السياسة تاني عشان موضوع كئيب ومش جايب همة لكن الاحداث بتفرض نفسها لسوء الحظ.

مش هكتب رايي في اي حاجة لاني قرفت لكن هقتبس من مدونة "طق حنك" بعض الاحداث اللي حصلت خلال الانتخابات البرلمانية اللي المفروض هتحدد حاجات كتير:

في قرى دائرة"العدوة": مشايخ يحذرون عبر ميكرفونات المساجد من لا يصوت لـ"الوطني" بالإعتقال.*

المشايخ يقولون علنا إنها تعليمات جمال (بيه) عبد الحفيظ عميد أمن الدولة بالمنيا

الجزيرة: قضاة يشتكون من تواطأ وتهاون أجهزة الشرطة في ضبط وإيقاف وقائع التزوير

بالصور وبـ"التواطأ": تقفيل الف صوت بسعر الصوت "40" جنيها بلجنة رقم -سيدات-33 لصالح هاني سرور (وطني) الازبكية

المئات يصوتون أكثر من مرة وعلى أصابعهم الحبر الفوسفوري بمدرسة صلاح الدين الأيوبي بالجيزة

فضيحة جديدة للنظام الحاكم: إعتداء بالضرب على مذيع الجزيرة أحمد منصور من بلطجية مجهولين

شراء الأصوات علانية في حلوان

رصد المراقبون قيام بعض المرشحين خاصة من الحزب الوطني و المستقلين بشراء أصوات الناخبين في بعض الدوائر الانتخابية مثل قصر النيل و المنيل و روض الفرج و الساحل و مدينة نصر و السيدة زينب و الجمالية و الدقي و العجوزة و امبابة. عن طريق " لبطاقة الدوارة"حيث يحصل الناخب من المرشح على بطاقة انتخابية تم التصويت عليها ليضعها في صندوق الاقتراع على أن يخرج ليسلمه البطاقة التي تسلمها داخل اللجنة بيضاء ليحصل على المبلغ المتفق عليه. تراوحت المبالغ المالية بين 30 و 100 جنيه و وصلت إلى 250 و 400 و 800 في بعض الدوائر.

نعمان جمعة : "الصورة الحالية سوداء وحزينة، وسيدفع الجميع الثمن"

وقال منظمات حقوق الانسان ابتدت تشتغل في مصر قال

يا رب يا رب

منتهى الجمال

2005-10-29T15:46:00.000-07:00

أخيرا حسيت بروح رمضان وريحة رمضان

أحسن حاجة عملتها في رمضان كانت السنة دي

الا وهي صلاة القيام

يا سلام على الحلاوة والهدوء اللي بحسة بعد القيام

حلوة اوي صلاة الجماعة ورا شيخ صوتة جميل في عز الليل

وجميل جدا منظر الشباب الكتير اللي واقفين يصلوا في خشوع

بيحسسوني ان في امل وان زي ما في الوحش الحلو بردة كتير اوي

هو دة رمضان فعلا مش رمضان مسلسلات سخيفة وممثلين ابتلونا بمسلسلات تافهو وهما معظمهم في الوقت دة في مكة بيصلوا ويستغفروا !

دي دعوة للكل لصلاة القيام

حتى لو فاضل على رمضان كام يوم والله هيكون لهم طعم تاني خالص

وربنا يبلغنا ليلة القدر ويبلغنا رمضان السنة الجاية ان شاء الله

كل سنة وانتوا طيبين

المدونين المصريين

2005-10-24T07:58:00.000-07:00

المدونين المصريين وخطوة للأمام

الهلال مع الصليب

2005-10-23T23:29:00.000-07:00

تقرير في قناة فضائية كان بيعرض اللي حصل عند كنيسة مارجرجس من يومين
حقيقي مهزلة وحاجة تكسف
الناس أعدادهم هائلة بيهتفوا "باروح بالدم نفديك يا محمد" "لا الة الا الله" ... بيحاولوا يحدفوا الحواجز الامنية بعيد عشان يقتحموا الكنيسة والأمن المركزي بيضرب فيهم جامد...الناس بتحدف طوب..بعد شوية غاز مسيل للدموع بيفرق الناس...بيرجعوا يتجمهروا تاني والأمن بيالجأ لطلقات الرش
مشاهد كانها منقولة من فلسطين ولا العراق
والسبب؟ مسرحية تافهة اتعرضت من سنتين ونص بتسئ للاسلام وللرسول علية الصلاة والسلام

وانا بتفرج كنت بفكر في حاجة واحدة-هو دة اللي مدايقكوا اوي يا مسلمين؟ شوية عيال بيشتمونا في سرهم برعاية قس؟
امال محدش اتظاهر لية لما اعتصموا في الكنيسة اعتراضا على اسلام واحدة منهم؟ مشفناش ربع المظاهرة دي حتى لما القران اتنكس في جوانتاناموا
ولو نبص على تاريخ الاسلام هنلاقي ان الرسول علية الصلاة والسلام ياما اتاذى من اليهود لكن هل في مرة حارب فيها اليهود لانهم سبوة او رموة علية قاذورات وهو بيصلي؟ ابدا
طب القران بيقول اية؟ مش بيقول
(لَتُبْلَوُنَّ فِي أَمْوَالِكُمْ وَأَنفُسِكُمْ وَلَتَسْمَعُنَّ مِنَ الَّذِينَ أُوتُواْ الْكِتَابَ مِن قَبْلِكُمْ وَمِنَ الَّذِينَ أَشْرَكُواْ أَذًى كَثِيراً وَإِن تَصْبِرُواْ وَتَتَّقُواْ فَإِنَّ ذَلِكَ مِنْ عَزْمِ الأُمُورِ)
طب مبنعملش كدة لية؟ ما طالبناش باعتذار رسمي زي الناس المحترمين لية؟ وبعدين ما البابا لغى عرض المسرحية ونفى القس اللي رعاها عايزين اية تاني؟

وبعدين لما احنا شيوخنا في صلاة الجمعة بيدعوا على اليهود والنصارى بمنتهى الثقة احنا زعلنا اوي كدة لية وهما بيهاجمونا بينهم وبين بعض؟

لازم الخطاب الديني يتغير باءة

وسؤال تاني مهم: اشمعنى دلوقتي بالذات المسرحية ظهرت؟ مين مصلحتة انة يولع في البلد؟

هل السبب التخلص من شعبية بعض الشخصيات المسيحية اللي أعلنت معارضتها للنظام الحاكم؟ يمكن والدليل ان الاستاذ خلة-المرشح المسيحي-انسحب

لكن معقولة عشان كرسي يولعوا في البلد؟ ما يتحرق الكرسي! أو ممكن بردة لشق وحدة الصف وتشتيت الانتباة عن انتخابات مجلس الشعب اللي هتحدد مصير الحزب الوطني ومصير التغيير اللي ممكن يحصل في البلد؟ وطبعا احسن حاجة تلهي الناس الدين

المحامي المسيحي اللي اتطعن وهو خارج من الكنيسة قال ان اللي طعنوة كان شكلهم بلطجية جايين مع بعض-كانهم متكلفين بمعنى أصح

قولة دة بيتطابق مع التغطية اللي في مدونة "طق حنك" هنا

توقعت أن أرى ملتحين أو مرتدي جلاليب أو حاملي مصاحف. معظم من رأيت كانوا من يوصفون
بشباب المناطق الشعبية. شباب "المنتئة". يدخلون للمظاهرة قليلاً ، ثم يخرجون ضاحكين
ليستريحوا أو يشربوا سيجارة. استمعت لواحد منهم و هو يحكي عن صديقه الذي أخذ في
التراجع مترقباً قنبلة غاز في الهواء و " في الآخر راح موقفها على صدره" و انفجر في
الضحك. ظلوا يحكون عن ركض أحدهم جهة رجال الأمن المركزي ثم تراجعه في آخر لحظة
مُهَوِشاً. لم يكونوا غاضبين . كانوا مستمتعين على ما يبدو. ينادون على بعضهم البعض
بصوت عال. يركضون ذهاباً و إيابا و على وجوههم الابتسامة. " فينك يا حمكشة" أفكر في
ما كتبه حمكشة عن 2010. يسأل رجل بائعاً شاباً في محل عن زميله فيقول له في عادية :
" لأ مش هنا، هوا في المظاهرة"
اللبيب يفهم باءة

بس الحاجة الاكيدة اللي المظاهرة دي وضحتها هي الكيان السياسي والاجتماعي الهش جدا اللي ممكن يُستغضب وينساق لاي حاجة بمنتهى البساطة والسذاجة

لازم باءة شعاراتنا اللي عمرها مليون سنة زي وحدة الهلال مع الصليب والوحدة الوطنية وكل الشعارات السطحية الجوفاء دي تتمحي ونبدا نتصارح باللي في قلوبنا بقالة سنين

حاجة تقرف

أهو جية يا ولاد

2005-10-04T23:11:00.000-07:00

عدت سنة بحالها

محستش بها

سنة كاملة جريت ورمضان جديد هل علينا

يا ترى اتغيرت؟ يا ترى هجاهد نفسي واتغير في رمضان دة؟

دة أول رمضان أقضية لوحدي بعيدة عن أهلي وطعمة مختلف جداَ

:)حاسة اني في مارس

كل حاجة زي ما هي

:)الفرق الوحيد اني بتغدى وخري شوية

مش شمة ريحة رمضان المرة دي

دايما كنت بحس ان رمضان لة ريحة

ريحة اللمة عالفطارريحة الدوشة والمعالق والسكاكين

سعادة أكل الخشاف على معدة مليانة أكل دسم

صوت الشيخ النقشبندي الجميل وهو بيغني رمضان جانا وفرحنا بة بعد غيابة وبقالة زمان

حتى اذان المغرب كنت بحس ان لة ريحة

افتكرت في اول يوم رمضان الفوازير اللي كنت بشوفها زماااان أوي

حاجات ومحتاجات وألف ليلة وليلة

هيييية كانت أيام

.كل سنة وانتوا طيبين

قتل جماعي اكشن تاني مرة

2005-10-01T15:57:00.000-07:00

كل يوم حادثة يبان فيها مدى الاستهتار والاهمال اللي بينتشر زي السرطان
الأول محرقة بني سويف وحالياً حادثة طريق المطار
وقائع الحادثة تنفع تكون فيلم هزلي
بس فيلم سخيف وبايخ
سباق يتنظم في طريق المطار اللي لا هو طريق مهجور ولا طريق معزول عن العامة
ازاي سباق يتنظم في مكان زي دة
وازاي أمناء الشرطة يقفوا يتفرجوا على المهزلة دي وهي بتحصل ويشاركوا فيها بسباق على متوسيكلاتهم
"امناء" دول امناء على اية؟
وازاي الاسعاف يتاخر كالعادة لمدة ساعة الا تلت
كل دي حاجات مش قادرة استوعبها

خمسة من شباب مصر ماتوا و14 جرحى
وكان في واحدة غلبانة قاعدة هي وابنها في الجنينة جنب السباق راحوا
ناس غلابة ملهمش دعوة بحاجة
ملهمش اللي يغير على دمهم وياخد حقهم من ابن الأمير

من الأموات اللي اتصلت عليهم الضوء هو الطيار/ مصطفى أحمد سليم فريد الذي تم تعيينه في مصر للطيران في 1/5/2002 و الحاصل على بكالريوس هندسة الحاسب الآلي سنة 2005 بتقدير جيد جدا
شاب عندة 23 سنة
مات في عربية الاسعاف بعد ما صارع الموت لمدة ساعة الا تلت

سائق العربية الفورد اللي دخلت في الناس دي وموتها هو شاب قطري الجنسية قدر يهرب من البلد في نفس يوم ارتكاب الحادثة
الغريبة باءة ان أصدقاء الشاب دة المصريين كانوا واقفين بيتفرجوا عالسباق وشافوة بيخرج من العربية ويهرب مع أصدقاءة القطريين ومحدش يمنعة
محدش يقول لة انت رايح فين انت مش شايف الاجرام اللي ارتكبتة
مفيش حاجة
بلاااادة ملهاش تفسير على كل الجهات
مفيش دم ولا ضمير ولا جدعنة ولا شهامة ولا أي حاجة

اللي ينقط باءة لو كان حقيقي ان كان في لواء أمر بوضع اسم الشاب القطري في قائمة الممنوعين من السفر
وسافر برضة!
بيقولوا عشان ابن أمير ومعاه جواز سفر دبلوماسي
طب لية وزير الداخلية مأمرش بالقبض على الشاب دة؟
لأن النائب العام مأصدرش قرار القبض على الشاب القطري غير بعد يومين
طبعا هو فلسع في نفس اليوم

ربنا قال:" ولكم في القصاص حياة يا اولي الالباب"
بس فين القصاص؟
مفيش قصاص يا رب
كلة بيضرب ويجري
ولو "أمين" الشرطة بيشارك في السباق يبقى نتوقع اية؟
منتوقعش غير دم مهدور
وأرواح زهيدة
ودموع رخيصة
وأهالي ملكومة
وحسبنا الله ونعم الوكيل
...

يا من اختارك الله لمصر
يا ريت تنظر لنا من برجك العاجي

صورة

2005-09-28T04:03:00.000-07:00

اية دة؟
الصورة دي اية التعليق المناسب لها؟
صورة حية على الجهل في القرن الحادي والعشرين؟
ولا دليل على ان لسا قدامنا مشوار طويل أوي؟
ولا اية؟
حاليا نكتفي بتقديم القرابين لرسول الله في أرض الكنانة!
واللي يرد على الصورة دي المظاهرات اللي قانت يوم 27 سبتمبر-يوم حلف اليمين الدستوري
من الهتافات:
لن يحكمنا ابن سوزان!
لن يحكمنا حسني مبارك!
لن يحكمنا البيت الأبيض!

ياللعار! ياللعار! مصر بيحكمها السمسار!

يا دي الزفت و يا دي الطين! لسة هيحكم ست سنين!

دوم دوم دوم دوم! باطل
!دوم دوم دوم دوم! حسني
!دوم دوم دوم دوم! باطل!
(دوم دوم دة صوت الطبول اللي استخدموا في المظاهرة من قبل شاب من اجل التغيير)

بدون تعليق!

ذكريات شتاء لذيذ

2005-09-24T15:33:00.000-07:00

موسيقى عمر خيرت ترجعني لذكريات شتاء سنة ما

أستيقظ متعكرة المزاج في السادسة والنصف صباحا على صوت أمي الحبيبة "يلا المدرسة"
"مش قادرة يا ماما كمان خمس دقايق"
"لا يلا لما تقومي هتفوقي"
أجر نفسي جر من فوق السرير
كل يوم اقول هنام بدري ومنمش
كل يوم الصبح اندم على الساعات اللي ضيعتها بالليل
من الأيام النادرة اللي الجو فيها برد فعلا
أركب الباص أنا واخواتي
أختي بتوريني "السحاب" اللي قدام بؤها لما تتكلم
أنظر لها باستخفاف وأنفخ في السر عشان أشوف "السحاب" أنا كمان
نوصل المدرسة أخيرا
أذهب لأول حصة وقد انزاح النوم قليلاً
ما ان ادخل حتى تجتاحني رغبة عارمة في النوم
“I don’t want to be here as much as you guys”
يوقظني تهكم المدرس الظريف
أقابل صديقاتي المقربات
نتكلم عن قصة شعر فلانة
توب علانة
"انا عايزة انزل شوبنج"
"وانا بفكر اقص شعري"
نتكلم شوية في السياسة وشوية في الفزيا اللي مش فاهمين فيها حاجة
"يلا نتقابل الويك ايند دة"
"نروح فين؟"
"مش عارفة"
"هنعمل اية طيب؟"
"مش عارفة نتقابل وخلاص"

ياااة أخيرا اليوم خلص وهروح أنام
الدنيا بتمطر واحنا ماشيين
بتمطر جامد أوي
لسا فاكرة اليوم دة
كنت بجري أنا وصديقاتي الاتنين
البوت بيطرطش في المية
أندة على اختي عشان تركب الباص
المدرس جية عشان يدخلنا الباصات
دمة خفيف الراجل دة
أتمنى للمرة الألف لو انا وصحباتي كنا في باص واحد
محدش كان عايز يدخل الباص
الجو كان جميل أوي
دخلنا بعد ما المدرس كان هيبوس رجلينا
“Guys, please I wanna go home”

نفترق واحنا بنضحك
مش عارفة على اية
اركب جنب الشباك وأنفخ فية عشان أعمل "سحابة" أشخبط فيها
أختي الصغيرة تافشني
تقلدني ونضحك

أطفي الموسيقى عشان ألحق المحاضرة

اه كم أفتقد أيام المدرسة

2005-09-23T07:59:00.000-07:00

Your Blogging Type Is Thoughtful and Considerate

You're a well liked, though underrated, blogger.You have a heart of gold, and are likely to blog for a cause.You're a peaceful blogger - no drama for you!A good listener and friend, you tend to leave thoughtful comments for others.

What's" Your Blogging Personality?

وطنُ يحرق أبنائة

2005-09-23T06:40:00.000-07:00

حادثة حريق بني سويف من أكتر الحوادث اللي أثرت في
خاصة بعد مشاهدة برنامج استضافوا فية شهود عيان على المهازل اللي حصلت من رجال المطافي والدكاترة في مستشفى بني سويف
مؤلم جداً ان المطافي توصل بعد ساعة من الحريق
مؤلم جدا ان ناس نسبة الحروق في جسمها 25% فقط تموت بسبب الاهمال ودمها يتسمم
مؤلم جداً مبلغ خمستاشر الف جنية
والمؤلم جداً اننا في القرن الواحد وعشرين ولسا في ناس بيحرقها الاهمال وانعدام الضمير
---------------------------------------------------------------------------------------

فاروق حسني استقال

لولولولولولولولي
الوزير اللي بقالة تقريباً عشرين سنة حافظ فيهم طبعا محافظة كاملة على اثار بلدنا الحبيبة ماشي بسبب فضيحة
والله دحنا بقينا بلد ديمقراطية اهو زينا زي فرنسا وأمريكا وأوروبا والدول المتقدمة :)
والدولة بتحترمنا اهو يا ولاد وبتحترم ضحايانا

حلو أوي مسلسل الاستقالة دة
حلو أوي
فاروق حسني يظهر على شاشات التلفزيون ويقول لنا يا شعب انا ماشي
اللي يغيظ ان مكنش في على وجة سعادتة أدنى علامات التأثر أو الأسف
مقلش أنا اسف ولو مرة واحدة
مقدمش تعازية لأسر الضحايا
مقلش معلش أنا غلطت كان في اهمال سامحوني

اما احنا شعب عايز الحرق صحيح
قال اسف قال
--------------------------------------------------------------------

والله منتا ماشي يا فاروق

استقالة الوزير العظيم اترفضت
و400 مثقف منهم فنانين قدموا عريضة طويلة انهم مش عايزين سيادة الوزير يمشي

استوقني حاجة
ربعميت مثقف وفنان
الفنانين بيتعدوا مع المثقفين
يسرا وأنيس منصور
اه يا بلد

حاجة تانية استوقفتني
يعني اية مثقف؟ مين هو الشخص اللي ممكن نطلق علية لقب "مثقف"؟
أي تلتميت واحد معاهم بكلريوس مع مية فنان منهم يسرا والهام شاهين وكوننا فريق من ربعميت مثقف
يلا هو يعني الكلام علية جمرك

الغريب اني لما سمعت عن حكاية "المثقفين" اللي مش عايزين فاروق حسني يتنحى استغربت جداً
ازاي أي بني ادم عندة دم يفكر كدة؟

السؤال دة اتجاوب علية بعدها بكان يوم
تحديدا يوم احتفال وزارة الثقافة بمهرجان مش عارفة اية
حاجة ملهاش لازمة
المهم ان ناس كتير كانوا مصطفين في مظاهرة صامتة احتجاجاً على المهرجان دة
بيقولوا ان احتراما لأرواح الضحايا اللي لسا "مربعنوش" زي ما بتتقال المفروض المهرجان دة كان يتلغي، أو يتأجل شوية على الأقل
صح، منطق صحيح فعلاً
القناة اللي كانت مغطية الحدث راحت تتكلم مع أحد "المثقفين" اللي كان معارض تنحي فاروق حسني وبيقولوا له
"مش غريبة ان حضرتك تشارك في الاحتجاج دة وحضرتك كنت من المعارضين لمغادرة السيد الوزير؟"
الراجل رد على المذيعة بمنتهى البساطة كأنها بتسأل أهبل سؤال في التاريخ: "حضرتك أنا كنت ممانع انة يمشي لأن دة مش هيفيد أسر الضحايا بحاجة. أنا قلت يتحاكم وبعدين يمشي. هو دة اللي وقعنا علية".

اية دة!!!!!!
احنا انضحك علينا تاني
تاني اية عاشر
باءة مش عايزينك تمشي يا فاااااروق؟
دول عايزينك تتحاكم يا سعادة الوزير
بس تتحاكم لية يا راجل وانت مش مسؤل عن حاجة
انا اللي بقولك يا سعادة الوزير المحترم بعلو صوتي : والله لنتا قاعد هي جت عليك
---------------------------------------

معدشي لينا تمن
عند اللي باعونا
إيه يعني ألف يموت
بالكلوي أو نبوت
في الولِعَه يرمونا
في القطر أو مسرح
متلاقي لك مطرح
وتروح في لمح البصر
وف نار يودونا
تسأل يقولك قدر
مين يعترض فينا
وإن يعلا منا الصوت
عمرو ما يوصل يوم
وللعلالي يفوت
أصل إحنا مالنا تمن
وإحنا أتخلقنا لكده
وأسأل يا عم الزمن
ملعون أهالينا
أشرب يا شعب المُرْ
إن مُتْ إيه هَيضُرْ
أهم شئ هو ه
يسلم أفندينا
------------------------------
بيقولوا قال شمعة طلعت هى الجانى
و"الجانى" عايش حُر يشرب فى فنجانى
حارتنا لو ليها شيخ توجعو الآهة
كان جَرْىِ لحظتها وعـ الحريق جانى
***
ياقـََصْر مين ثقّفك قوم تيجى تحرقنا
"بَـعقوبة" مش زيّك ولا حِتة فى عِراقنا
كان مالنا بس احنا بالفن والمسرح
متعودين ناكل لقمتنا بِعَرَقنـا

بقلم شعراء قهوة كتكوت محمد فارس ومحب

بلوجي

2005-09-21T12:31:00.000-07:00

بعد التردد كثيراً
قررت أواجه كسلي وأعمل مدونة أضفض فيها زي ما انا عايزة :)
إن شاء الله تكون فكرة ناجحة :)